გენდერული ძალადობა, მიზეზები და დაცვის მექანიზმები - ამ თემაზე ჩატარდა ახალგაზრდული კლუბების საინფორმაციო შეხვედრები სენაკის მე-7 სკოლაში, წყალტუბოს მე-2 საჯარო სკოლაში და ქუთაისის ქალთა მხარდაჭერის ცენტრში. მონაწილეებს მიეწოდათ ინფორმაცია 16-დღიანი კამპანიის შესახებ ქალთა მიმართ ძალადობის წინააღმდეგ.

ახალგაზრდებისთვის ეს თემა არ არის ახალი, ამიტომ ისინი ინტერესით ჩაერთნენ დისკუსიაში.

მონაწილეთა მოსაზრებებიდან:

„მე მომწონს  მსგავსი შეხვედრები და დისკუსიები, სადაც ბევრ საჭირო სიახლეს ვგებულობ.“

„მე მინდა, რომ ჩემმა თაობამ მნიშვნელოვანი წვლილი შეიტანოს გენდერულად თანასწორი საზოგადოების შექმნაში. ასეთი შეხვედრები ხელს უწყობს ამ პროცესს“.

ქუთაისის ამომრჩეველ ქალთა კლუბის სხდომაზე კლუბის წევრებმა ისაუბრეს იმაზე, როგორ ჩაერთნენ საერთაშორისო კამპანიაში „16 აქტიური დღე ქალთა მიმართ ძალადობის წინააღმდეგ“. აღნიშნეს, რომ წინა წლებთან შედარებით ინფორმირებულობა გაზრდილია, მოსახლეობამ მეტი იცის პრევენციული მექანიზმების შესახებ.

კლუბის წევრებმა თავიანთი ინიციატივით ჩაატარეს საინფორმაციო შეხვედრები - სხდომაზე ამის შესახებაც ისაუბრეს.

კლუბზე, ტრადიციულად, რამდენიმე ადგილობრივი პრობლემება შეარჩიეს ადვოკატირებისა და მოგვარების მიზნით.

პროექტი ხორციელდება აშშ საელჩოს მხარდაჭერით

  

პროექტი ხორციელდება აშშ საელჩოს მხარდაჭერით

საერთაშორისო კამპანიის „16 აქტიური დღე ქალთა მიმართ ძალადობის წინააღმდეგ“ ფარგლებში ქუთაისის ახალგაზრდული კლუბის ინიციატივით ჩატარდა საინფორმაციო შეხვედრები. ერთ-ერთი შეხვედრა იყო კერძო სკოლაში „ღონე ქვეყნისა“, მეორე კი  - კერძო სკოლა „პროგრესში“.

ამ სკოლებში ფონდი „სოხუმის“ ფორუმ-თეატრის ახალგაზრდა მსახიობებმა წარმოდგენები გამართეს.

მოსწავლეები  და მასწავლებლები აქტიურად ჩაერთნენ დისკუსიაში. მათი აზრით, ყველა ფორმით უნდა ვუთხრათ ძალადობას „არა!“

წყალტუბოში ამომრჩეველ ქალთა კლუბი განსხვავებული ფორმატით ჩატარდა - გაიმართა კონფერენცია, რომლითაც გაიხსნა კამპანია „16 აქტიური დღე ქალთა მიმართ ძალადობის წინააღმდეგ“. კონფერენციაზე მოწვეულები იყვნენ ადგილობრივი თვითმმართველობის და ფონდი „სოხუმის“ წარმომადგენლები, ადგილობრივი და დევნილი ქალბატონები, ახალგაზრდები.

მონაწილეებმა მოისმინეს კამპანიის ისტორია. ფსიქოლოგისა და იურისტის მოხსენებები ეხებოდა ძალადობის სავალალო შედეგებს მოზარდებზე. მოეწყო ახალგაზრდების პრეზენტაცია თემაზე „არა - ძალადობას“. დაფიქსირდა მათი მოსაზრებები ძალადობის პრევენციისთვის.

შეხვედრამ მონაწილეთა აქტიური ჩართულობის ფონზე ჩაიარა.

პროექტი ხორციელდება აშშ საელჩოს მხარდაჭერით

ოზურგეთის ამომრჩეველ ქალთა კლუბის მორიგი შეხვედრა დაეთმო კლუბისა და გენდერული საბჭოს წევრების აქტიურ ჩართულობის დაგეგმვას 16-დღიან კამპანიაში ქალთა მიმართ ძალადობის წინააღმდეგ. გადაწყდა, რომ საბჭოსა და კლუბის წევრები ერთობლივად ჩაატარებენ საინფორმაციო შეხვედრებს ადგილობრივი თვითმმართველობის წარმომადგენლებთან, ვორკშოპებს - ქალაქისა და მუნიციპალიტეტის სკოლებსა და ბაღებში, კოლეჯ „ჰორიზონტში“.

სხდომაზე აღინიშნა, რომ ქალაქ ოზურგეთის საკრებულოში აქტიურად მიდის მუშაობა გენდერული თანასწორობის საბჭოს ჩამოსაყალიბებლად.

პროექტი ხორციელდება აშშ საელჩოს მხარდაჭერით

ქუთაისის ამომრჩეველ ქალთა კლუბის სხდომაზე კლუბის წევრებმა ისაუბრეს საპარლამენტო არჩევნების შედეგებზე. აღნიშნეს, რომ  წინა პარლამენტთან შედარებით წელს მეტი ქალია წარმოდგენილი. მათი აზრით, ეს წინგადადგმული ნაბიჯია, თუმცა  თვლიან, რომ მაინც არასაკმარისია და ემხრობიან კვოტირებას.

საუბარი შეეხო მზადებას საერთაშორისო კამპანიისთვის „16 აქტიური დღე ქალთა მიმართ ძალადობის წინააღმდეგ“. კლუბის წევრებმა გამოთქვეს სურვილი, ჩაატარონ საინფორმაციო შეხვედრები სკოლის მოსწავლეებთან, პოლიტიკური პარტიის წარმომადგენლებთან, ბაღის აღმზრდელებთან  და სხვა...

ყურადღების მიღმა არ დარჩენილა ადგილობრივი პრობლემების ადვოკატირებაც. სხდომაზე განიხილეს რიგი  საკითხები და მათგან შეარჩიეს განსაკუთრებით პრიორიტეტულები.

ხონის საკრებულოში ჩატარდა ამომრჩეველ ქალთა კლუბის სხდომა. შეკრებილებმა ისაუბრეს 2016 წლის საპარლამენტო არჩევნების მეორე ტურის შედეგებზე, ქალთა მიმართ ძალადობის წინააღმდეგ 16-დღიანი კამპანიის ფარგლებში ღონისძიებების დაგეგმვაზე, ადგილობრივი პრობლემების გამოვლენასა და ადვოკატირებაზე.

აღინიშნა, რომ 25 ნოემბერს ძალადობის წინააღმდეგ მიმართულ აქციაში მონაწილეობა აუცილებელია - მოხდება პრობლემის აქტუალობის გააზრება საზოგადოების ფართო სპექტრში.

პროექტი ხორციელდება აშშ საელჩოს მხარდაჭერით

ბათუმის ამომრჩეველ ქალთა კლუბის სხდომაზე გაგრძელდა მსჯელობა  წინა თვეში დასმულ საკითხზე - ლერმონტოვის 107-ში გადახურვის და სარდაფის დაბინძურების პრობლემა. მოწვეულმა სტუმარმა - აიპი კორპუსების  წარმომადგენელმა ისაუბრა არსებულ პროგრამებზე და პრობლემის მოგვარების გზაზე.

შეხვედრაზე დაიგეგმა 16-დღიან კამპანიაში ქალთა მიმართ ძალადობის წინააღმდეგ კლუბის ჩართულობა. გაიწერა კონკრეტული ღონისძიებები.

შეხვედრას ესწრებოდა ქობულეთის საკრებულოს დეპუტატი ლია შაქარიშვილი, რომელმაც ამომრჩეველ ქალთა კლუბის წევრობის სურვილი გამოთქვა.ის დაინტერესებულია საკრებულოში გენდერული თანასწორობის საბჭოს შექმნით,ამასთან დაკავშირებით მან კონსულტაცია გაიარა ბათუმის გენდერული საკონსულტაციო საბჭოს წევრებთან, რომლებიც ამჟამად კლუბში არიან გაერთიანებულნი.

პროექტი ხორციელდება აშშ საელჩოს მხარდაჭერით

15 ნოემბერს სენაკის საკრებულოს სხდომათა დარბაზში შეიკრიბნენ ამომრჩეველ ქალთა კლუბის წევრები. მორიგ სხდომაზე მონაწილეობა მიიღეს კლუბის და გენდერული საკონსულტაციო საბჭოს წევრებმა, დეპუტატმა ქალებმა და საკრებულოს თანამშრომლებმა.

გაიმართა საპარლამენტო არჩევნების შედეგების განხილვა ქალთა წარმომადგენლობის თვალსაზრისით. ქალებმა აღნიშნეს, რომ ადგილობრივი თვითმმართველობის მომავალ არჩევნებზე რაც შეიძლება მეტი ქალი უნდა იქნეს წარმოდგენილი და ამაზე, უპირველესად, პოლიტიკურმა პარტიებმა უნდა იზრუნონ.

საუბარი შეეხო ქალთა და ბავშვთა მიმართ ძალადობის თემას და კარს მომდგარ 16- დღიან საერთაშორისო-საინფორმაციო კამპანიას სლოგანით „სახლში მშვიდობიდან - მსოფლიოში მშვიდობამდე“. 25 ნოემბერს კლუბის წევრები შეუერთდებიან ფონდი „სოხუმის“ მასშტაბურ აქციას, რომელიც სენაკის გარდა დასავლეთ საქართველოს კიდევ 8 ქალაქში გაიმართება. ისინი აგრეთვე ჩაატარებენ საინფორმაციო შეხვედრებს საბავშვო ბაღებსა და სკოლებში.

პროექტი ხორციელდება აშშ საელჩოს მხარდაჭერით