სენაკში ქალთა სამუშაო ჯგუფის შეხვედრა გაიმართა. ჯგუფის წევრებმა ერთად იმსჯელეს იმ ინიციატივებზე, რომელთა განხორციელებაც მომდევნო თვიდან იგეგმება. მათი ინიციატივები შეარბილებს პრობლემებს, რომლებიც თემში მცხოვრები ქალების ადამიანურ უსაფრთხოებას არღვევს.
წყლით დატბორილი სარდაფები, ნესტი, სუნი, ქვეწარმავლები, სარეველა მცენარეებისგან წარმოქმნილი ჯანმრთელობის საფრთხეები - სენაკის დევნილთა დასახლებაში მცხოვრები ოჯახებისთვის სერიოზულ პრობლემებს ქმნის.
ჯგუფის წევრებს აქვთ სამოქალაქო ინიციატივების განხორციელების შესაძლებლობა - შეიძინონ წყლის ამოსაქაჩი ტუმბოები, ელექტროცელები და ასე გაუმკლავდნენ სხვადასხვა თემში გამოკვეთილ აქტუალურ პრობლემებს.
პროექტი ხორციელდება გაეროს ქალთა ორგანიზაციის
მხარდაჭერით
მოქალაქეთა ინფორმირება მსხვერპლთა დახმარების სერვისებზე, პრობლემათა იდენტიფიცირება და მართვა - ამ მიმართულებით აქტიური მუშაობა მიდის ქალთა მხარდაჭერის ცენტრებში.
- ინფორმაცია მსხვერპლთა დახმარების სერვისებზე ქალებს მისცემს საშუალებას, სწორი გადაწყვეტილება მიიღონ და არსებული სერვისებით ისარგებლონ, - ასე ფიქრობენ საინფორმაციო შეხვედრების მონაწილეები.
თვის განმავლობაში შეხვედრებში 150-ზე მეტი ქალი იყო ჩართული. 10-ზე მეტი კრიზისული ოჯახის იდენტიფიცირება მოხდა. მათთან მუშაობას ფსიქოლოგი და იურისტი აგრძელებენ.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ფორუმ-თეატრმა აგვისტოში გეგმით გათვალისწინებული შეხვედრები გამართა მაყურებლებთან. ერთი იყო ქუთაისის ლადო მესხიშვილის სახელობის სახელმწიფო თეატრის მცირე დარბაზში, მეორე კი - ქალაქის ცენტრალურ პარკებში.
შეკრებილებმა აღნიშნეს, რომ წარმოდგენები საინტერესოა, კარგი ფორმატით ხდება აქტუალური პრობლემების წარმოჩენა. თუმცა ისინი დისკუსიაში ნაკლებად იღებენ მონაწილეობას.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქუთაისში, ნიკეას 21-ში, საინფორმაციო შეხვედრა გაიმართა პრობლემების ადვოკატირების და სამოქალაქო ჩართულობის საკითხებზე.
საინიციატივო ჯგუფის წევრი მარიკა პაპავა, რომელმაც ქალთა ფონდ „სოხუმში“ გაიარა ტრენინგები, ცდილობს, თავის თემში არსებული პრობლემები განიხილოს და ყველა ბერკეტი გამოიყენოს მათ გადასაჭრელად.
დევნილთა თემში მთავარი პრობლემებია: სანიაღვრე სისტემის გაუმართაობა, დატბორილი სარდაფი და დანესტილი ფასადი.
საინიციატივო ჯგუფმა მოამზადა წერილი, რომელიც შესაბამის უწყებებს წარედგინება. რეაგირების შემდეგ უნდა მოგვარდეს პრობლემები, რომლებიც საფრთხის ქვეშ აყენებს მოსახლეობის ჯანმრთელობას.
პროექტი ხორციელდება USAID-ის ადგილობრივი თვითმმართველობის პროგრამის ფარგლებში
ქალთა ფონდ „სოხუმში“ ფრჩხილის მოწესრიგების ორთვიანი სრული საბაზისო კურსი დასრულდა. მონაწილეებს სერთიფიკატები გადაეცათ. სწავლების მთავარი მიზანი ქალების ეკონომიკური გაძლიერების რეალური პერსპექტივაა, რაშიც მათ ახალი პროფესიის ათვისება უწყობს ხელს.
მიუხედავად იმისა, რომ დღის სარეაბილიტაციო ცენტრს მსგავსი სასწავლო პრაქტიკის გამოცდილება აქვს, უკრაინელი ტრენერის მასტერკლასი მაინც საუკეთესო გამონაკლისი იყო. კურსდამთავრებულებმა აღნიშნეს:
„მანამდეც მისწავლია ფრჩხილის მოვლის ტექნიკა, მაგრამ შედარებაც არ შეიძლება ამ ხარისხთან, რაც თქვენთან ვნახე“.
„პედაგოგის საერთაშორისო სერთიფიკატი განაპირობებდა იმას, რომ ახალი პროფესია მეცნიერების დონეზე შევისწავლეთ.“
„მადლობა ქალთა ფონდს - საუკეთესოები ხართ!“
წყალტუბოს ქალთა საინიციატივო ჯგუფში დევნილთა სამი თემის წარმომადგენლები არიან გაერთიანებული და, შესაბამისად, მოხდა სამი პრიორიტეტული პრობლემის შერჩევა, რომლებიც ფინანსურ მხარდაჭერას მოიპოვებს პროექტის „მშვიდობის ელჩი ქალებისა და ახალგაზრდა ქალების ქსელის“ ფარგლებში.
ჯგუფის მორიგ შეხვედრაზე პრობლემებზე და სამოქალაქო ინიციატივებზე ისაუბრეს. სამოქალაქო ინიციატივების განხორციელება ხელს შეუწყობს დევნილთა თემში მცხოვრები ადამიანების უსაფრთხოებას.
პროექტი ხორციელდება გაეროს ქალთა ორგანიზაციის
მხარდაჭერით
ონლაინ გაიმართა ქუთაისის ქალთა საინიციატივო ჯგუფის შეხვედრა. ჯგუფში გაერთიანებულნი არიან ოთხ თემში მცხოვრები დევნილები, ამიტომ მათ ოთხი ინიციატივა წარმოადგინეს.
ჯგუფის წევრებმა თავიანთ თემში უკვე შეისწავლეს პრობლემები და მოახდინეს მათი რანჟირება. ოთხივე თემში მალე დაიწყება სამოქალაქო ინიციატივების განხორციელება, რაც გააუმჯობესებს დევნილთა მდგომარეობას.
პროექტი ხორციელდება გაეროს ქალთა ორგანიზაციის
მხარდაჭერით
ძელსკამების და გარე განათების არარსებობა, მიუსაფარი ძაღლები, ერთადერთი ტრანსპორტი, დიდი სიჩქარით მოძრავი ავტომობილები - ეს არის იმ პრობლემების მცირე ჩამონათვალი, რომლებიც შერვაშიძის ქუჩის №53-ის მე-2 კორპუსში მცხოვრებ დევნილებს აწუხებთ და აღნიშნეს კიდეც შეხვედრაზე.
რიმა კალანდია დევნილთა თემის წარმომადგენელია. ქუთაისის ქალთა საინიციატივო ჯგუფის წევრებთან ერთად მან გაიარა ტრენინგები ადვოკატირების საკითხებზე და ახლა ინფორმაციას აწვდის თემის სხვა წევრებს. მისი აზრით, ადამიანები აქტიურად უნდა ჩაერთონ საკუთარი საჭიროებების მოგვარებაში. ქალთა საინიციატივო ჯგუფი ქუთაისის მერიის სახელზე ამზადებს წერილს.
პროექტი ხორციელდება USAID-ის ადგილობრივი თვითმმართველობის პროგრამის ფარგლებში
სამტრედიის საგანმანათლებლო რესურსცენტრში მრგვალი მაგიდის ფორმატის შეხვედრა გაიმართა.
ქალთა ფონდი „სოხუმის“ იურისტმა ისაუბრა ქალთა მიმართ ძალადობის ან/და ოჯახში ძალადობის მსხვერპლთა გამოვლენის, მათი დაცვის, დახმარებისა და რეაბილიტაციის ეროვნული რეფერირების პროცედურების შესახებ.
შეხვედრის მონაწილეებმა მიიღეს ინფორმაცია არასამთავრობო ორგანიზაციების მნიშვნელოვან როლსა და პოზიტიურ გავლენაზე, ასევე გაეცნენ ჩვენი ორგანიზაციის სერვისებს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
